Լուրեր
Ուռուցքային հիվանդությունների ախտորոշման մեթոդները. ուռուցքաբան Վահագն Համբարձումյան
Ի՞նչ սկզբունքով են ընտրվում ուռուցքային հիվանդությունների ախտորոշման մեթոդները:
Ուռուցքային հիվանդությունների ախտորոշման բազմապիսի մեթոդներ կան։ Դրանց կիրառումը կախված է նրանից, թե օրգան-համակարգում է ուռուցքն առաջացել:
Կան հետազոտության մեթոդներ, որոնք կիրառվում են գրեթե բոլոր դեպքերում, կան նաև մեթոդներ առանձին օրգանների հետազոտման համար:
Որո՞նք են այդ մեթոդները:
Կիրառվող հիմնական մեթոդներից են համակարգչային շերտագրումը, մագնիսա-ռեզոնանսային տոմոգրաֆիան, պոզիտրոն էմիսիոն տոմոգրաֆիան, ուլտրաձայնային հետազոտությունները, բիոփսիան, ինչպես նաև, ընդհանուր մեթոդներից զատ, կիրառվող առանձնահատուկ մեթոդները:
Կախված առանձին ուռուցքների տեսակներից, ընդհանուր մեթոդներին զուգահեռ, կիրառվում են նաև առանձին նեղ մասնագիտական հետազոտություններ, որոնք նշանակում են համապատասխան մասնագետները. կրծքագեղձի ուռուցքների դեպքում՝ մամոգրաֆիա, գինեկոլոգիական ուռուցքների դեպքում` կոլպոսկոպիան կամ հիստերոսկոպիան և այլն:
Այս հետազոտություններից բացի արյան մեջ որոշվում են նաև օնկոմարկերները, որոնք կարևոր ախտորոշիչ նշանակություն ունեն:
Օնկոմարկերները սպիտակուցներ են, որոնց քանակական ցուցանիշն ուռուցքների առկայության ժամանակ շատ բարձր է: Նրանք փոքր քանակով օրգանիզմում առկա են միշտ, որոշ չափով ավելանում են նաև բորբոքային հիվանդությունների դեպքում:
Այս բոլոր մեթոդները կիրառվո՞ւմ են մեր երկրում:
Այո, բոլոր նշված մեթոդները Հայաստանում կիրառվում են:
Իսկ կա՞ն մեթոդներ, որոնք նոր են և` կա՛մ դեռ քիչ են կիրառվում, կա՛մ դեռ փորձարկումների փուլում են:
Նորարարությունները բժշկության մեջ շատ են, միշտ կան, անընդհատ բնույթ են կրում: Նորարարություններ կան բոլոր տիպի ուռուցքների բուժման մեջ, և որոշ մեթոդներ արդեն կիրառվում են:
Վերջին շրջանում ուռուցքաբանությունը զարգանում է իմունաթերապիայի ուղղությամբ, և քիմիաթերապիայի որոշ բուժումներ արդեն փոխարինվում են իմունաթերապիայով: Հիմքում իմուն համակարգի կարգավորումն է, երբ իմունիտետն ավելի արդյունավետ է պայքարում ուռուցքային բջիջների դեմ: Արդյունքները բավականին գոհացուցիչ են. արդյունավետությունը բարձր է:
Բժշկության մեջ մեծ թափով զարգանում է նաև բժշկական գենետիկան՝ գենային ինժեներիան, և ներկայում կան որոշ հիվանդություններ, որոնք հնարավոր է բուժել գենային թերապիայով: Այն արդեն կիրառվում է, սակայն խիստ սահմանափակ հիվանդությունների դեպքում:
