Լուրեր

Ոտնաթաթի առաջին մատի վալգուսային դեֆորմացիան (Hallux Valgus. ոտնաթաթի ոսկրիկ) կապված է մեծ մատի թեքման հետ` դեպի ճկույթը: Հիվանդությունը զարգանալու դեպքում մեծ մատի հիմքի մոտ ձևավորվում է գերաճ՝ ոսկրային հյուսվածքի առաջացման և առաջին նախագարշապարային ոսկրի արտացցման հետևանքով: Առաջին մատի շեղման հետևանքով 2-րդ և 3-րդ մատների մուրճիկանման ոսկրերը ենթարկվում են դեֆորմացիայի:

Սկզբնական շրջնում անհանգստացնում է կոսմետիկ դեֆեկտը, հետո սկսվում է ցավ, ոտնաթաթի շարժողական ֆունկցիայի խանգարում, որն իր հերթին առաջ է բերում այլ օրթոպեդիկ խնդիրներ:

Հիմնական ախտանիշներն են.

• ցավ` առաջին մատի շրջանում,
• ոտնաթաթի մատների դեֆորմացիա,
• կոշիկի ընտրության դժվարացում,
• քայլելիս` հոգնածության և անհարմարավետության զգացում,
• առաջին մատի հիմքի շրջանում այտուց և կարմրածություն, մեծացած «ոսկրիկ»:

Halluх valgus-ի զարգացման պատճառները

• գենետիկ նախատրամադրվածությունը,
• անհարմար կոշիկ կրելը,
• ավելորդ քաշը,
• հորմոնալ խանգարումները
• կապանային համակարգի թուլությունը և այլն:

Բուժումը

1. Ոչ վիրահատական բուժումը կիրառվում է հիվանդության սզբնական փուլերում` նպատակ ունենալով դանդաղեցնել դեֆորմացիայի զարգացումը և նվազեցնել ցավերը:

Այն ներառում է.

• հարմար կոշիկների և օրթոպեդիկ ճիշտ պարագաների օգտագործումը,
• ֆիզիոթերապիան,
• հակաբորբոքային թերապիա:

2. Բարդացած դեպքերում կիրառվում է վիրահատական բուժում:

Ներկայում ամենաարդյունավետ համարվում է վիրահատական միջամտությամբ շտկող ոսկրահատման մեթոդը, ինչի շնորհիվ հնարավոր է վերացնել դեֆորմացիան և ցավերը: Վիրահատության ժամանակ կատարվում է միջամտությունների դասական մեթոդների համատեղում նվազագույն տրավմատիկ ժամանակակից տեխնիկաների հետ: Դեֆորմացիան նկատելու դեպքում պետք է դիմել վնասվածքաբանի, ով իրականացված որոշ հետազոտություններից հետո անհրաժեշտ բուժում կնշանակի: