Պացիենտների համար

Բկանցքում լորձի ներկայությունն օրգանիզմի բնական ֆիզիոլոգիական վիճակ է: Լորձն օգնում է պաշտպանվել մանրէներից և գործում է որպես վերին շնչուղիների քսանյութ: Նորմալ է քիթ-ըմպանում առաջացած քիչ քանակի լորձ կուլ տալը: Բայց եթե այն մածուցիկ է, քանակով շատ, և տևում է երկար, կարելի է բնութագրել որպես հետքթային հոսքի համախտանիշ: Այն անվանում են նաև վերին շնչուղիների հազի համախտանիշ:

Հետքթային հոսքի համախտանիշը տարածված խնդիր է:

Ախտանշանները

Այս համախտանիշը, սովորաբար, պահպանվում է մի քանի օր կամ շաբաթ՝ կախված պատճառից: Երբեմն ունենում է քրոնիկ ընթացք:

Դիտվում են հետևյալ ախտանշանները.

• հաճախակի հազ,
• կոկորդի հետին մասում այրոցի, քերծման զգացողություն կամ քոր,
• կոկորդի հետին մասում գնդի զգացողություն,
• լորձի մեծ քանակի զգացողություն կոկորդում՝ գիշերը,
• ձայնի խռպոտություն,
• տհաճ հոտ՝ բերանից։

Պետք է բժշկի դիմել, եթե դա տևում է մի քանի շաբաթից ավելի, դժվարանում է կլման ակտը, առկա են շնչառության հետ կապված խնդիրներ, բարձր ջերմություն, փսխում կամ ցավ՝ ականջներում:

Պատճառները

• ՔԿԱ օրգանների քրոնիկ հիվանդություներ,
• ստամոքս-կերակրափողային ռեֆլյուքս,
• սեզոնային ալերգիա,
• ալերգիա՝ փոշուց, կենդանիների մազից և այլ,
• անատոմիական շեղումներ (քթի միջնապատի թեքվածություն, քթի խեցիների մեծացում),
• Որոշ դեղերի կիրառություն (երբեմն հակաբեղմնավորիչներ, հորմոններ, հիպոտենզիվներ),
• անոթասեղմիչ ցողացիրների, կաթիլների չափից ավելի օգտագործում,
• վարակներ (սինուսիտ, գրիպ, ցիտոմեգալովիրուս, ադենովիրուս, ստրեպտոկոկային անգինա),
• հղիությամբ պայմանավորված ռինիտ,
• վազոմոտոր ռինիտ,
• նյարդաբանական հիվանդություններ
• քթում և խեցիներում՝ օտար մարմին։

Կոկորդում մածուցիկ լորձի առաջացմանը կարող են նպաստել.

• կծու սնունդը,
• կաթնամթերքը,
• ֆիզիկական գերծանրաբեռնվածությունը,
• քթում օտար մարմինը։

Ախտորոշումը

• քիթ-ըմպանի զննում, անամնեզ,
• ռինոսկոպիա,
• գործիքային հետազոտություն (էնդոսկոպիկ ռինոսկոպիա, նազոֆարինգոսկոպիա, լարինգոսկոպիա, 24 ժամյա рН զոնդ՝ թթվային ռեֆլյուքսի հայտնաբերման համար, էզոֆագոգաստրոդուոդենոսկոպիա),
• քթի և հարքթային խոռոչների ՀՏ, գլխի ՄՌՏ
• լաբորատոր թեստեր,
• ալերգիայի հայտնաբերման թեստ։

Բուժումը

Ճիշտ բուժման համար կարևոր է առաջնորդվել խնդիրն առաջացնող պատճառն ուսումնասիրելուց:

Վիճակը հնարավոր է թեթևացնել հետևյալ միջոցներով.

• շատ ջուր խմել, որպեսզի լորձը ջրիկանա,
• քնելիս սենյակի օդը խոնավացնել,
• լվանալ քթի խոռոչները թույլ աղային լուծույթով,
• օգտագործել խորխը ջրիկացնող խորխաբեր միջոցներ,
• հակահիստամինային միջոցներ՝ ալերգիայի դեպքում,
• ինհալացիաներ։

Դեղորայքային բուժումը ներառում է հակաալերգիկ պատրաստուկներ, ստերոիդ հակաբորբոքիչներ, ըստ ցուցման՝հակաբիոտիկներ, հակասնկային միջոցներ:

Բուժման կոնսերվատիվ միջոցների անարդյունավետության կամ անատոմիական խնդիրների դեպքում (միջնապատի թեքվածություն և այլ) հնարավոր է վիրահատական միջամտության անհրաժեշտություն լինի: