Պացիենտների համար

Որոշ դեպքերում նշիկները կարող են մեծանալ առանց ջերմության, բայց այդ վիճակը ևս պահանջում է ուշադրություն և բուժում՝ բարդություններից խուսափելու համար:

Նշիկներն իմունային համակարգի կարևոր օրգաններ են:  Նշիկների հիմնական խնդիրն է հայտնաբերել ախտածին միկրոօրգանիզմները և արտադրել հակամարմիններ՝ նրանց դեմ պայքարի համար:

Նշիկների մեծացումն, ինքնին, ոչ թե հիվանդություն է, այլ ախտանշան:

Նշիկների մեծացում դիտվում է հետևյալ դեպքերում.

• Վարակներ,
• գենետիկորեն պայմանավորված հիպերտրոֆիաներ,
• արյան հիվանդություններ (լիմֆոպրոլիֆերատիվ հիվանդություններ),
• աուտոիմուն հիվանդություններ,
• ալերգիկ բորբոքում և այտուց։

Սովորաբար, այդ հիվանդություններն ընթանում են բարձր ջերմությամբ, բայց որոշ դեպքերում նշիկները կարող են մեծանալ առանց բարձր ջերմության:

Դա տեղի է ունենում հետևյալ դեպքերում.

• Ալերգիաներ․ ալերգեններ կարող են լինել կենդանու բուրդը, փոշին, ծաղկափոշին, սնունդը, միջատները, կենցաղային քիմիան։
• Սնկային ախտահարում․ դիտվում են հետևյալ ախտանշանները՝ կոկորդի քերծում, բերանի չորություն, կաթնաշոռանման փառ՝ լորձաթաղանթին։
• Չոր օդ․ երկարատև չոր օդ շնչելու հետևանքով կոկորդի լորձաթաղանթը չորանում է և նշիկները մեծանում են, նույնը լինում է նաև գազով լցված սենյակում:
• Ծխելը․ ծխախոտի ծուխն այրում է լորձաթաղանթը, որի արդյունքում կարող է նշիկների այտուց զարգանալ։
• Անգինայի որոշ տեսակներ (տոնզիլիտներ). վարակիչ հիվանդությունների ժամանակ ջերմությունը բարձրանում է, քանի որ բարձր ջերմության պայմաններում հիվանդության հարուցիչները ոչնչանում են: Եթե ջերմությունը չի բարձրանում, նշանակում է մանրէների քանակն օրգանիզմում մեծ չէ: Առանց ջերմության նշիկները կարող է մեծանալ նաև ոչ լիարժեք բուժման պատճառով, երբ ախտաբանությունը քրոնիկ ընթացք է ընդունում: Նման դեպքերում առողջացումը ձգձգվում է և հնարավոր է բարդությունների զարգացում:

Առանց ջերմության նշիկների մեծացման առանձնահատկությունները

Նույնիսկ ջերմության բացակայության պայմաններում, եթե առկա է նշիկների մեծացում, կարող են դիտվել որոշ ախտանշաններ.

• գլխացավ,
• կոկորդի ցավ,
• ախորժակի բացակայություն,
• կլման դժվարություն,
• բկանցքում չորություն և քերծում,
• ավշային հանգույցների մեծացում և ցավոտություն՝ շոշափման ժամանակ,
• հոգնածություն, մարմնի ջարդվածություն, քնկոտություն, գրգռվածություն, անաշխատունակ վիճակ։

Բուժումը

Բուժման համար, նախ, պետք է պարզել նշիկների մեծացման պատճառը: Եթե պատճառը վարակն է կամ սնկային ախտահարումը, նշանակվում է հակաբակտերիալ կամ հակասնկային թերապիա, կոկորդի ողողումներ՝ հատուկ միջոցներով, վիտամինաթերապիա:

Եթե կոնսերվատիվ բուժումն անարդյունավետ է, առկա է տոքսիկ-ալերգիկ վիճակ, բարդություններ, կարող է նշանակվել տոնզիլէկտոմիա՝ նշիկների հեռացում:

Կանխարգելումը

• Բարձրացնել օրգանիզմի դիմադրողականությունը. ճիշտ սնվել, կոփվել, մարզվել, հրաժարվել վնասակար սովորություններից, կարգավորել քունը,
• խուսափել ախտաբանությանը նպաստող գործոններից. չմրսել, խոնավացնել բնակարանը, բացառել ալերգենների ազդեցությունը,
• ժամանակին բուժել վարակիչ հիվանդությունները,
• կատարել բկանցքի և նշիկների լակունաների կանխարգելիչ ողողումներ։