Պացիենտների համար

Ձախ ենթակողում, երբեմն, ի հայտ են գալիս տհաճ զգացողություններ, որը հաճախ անցնում է 10-15 րոպեից:  Ոմանց մոտ այն մշտական է և խանգարում է լիարժեք կյանքին: Այդ զգացողությունները կարող են  առաջանալ տարբեր գործոններից, օրինակ, շատ սուր կամ ճարպոտ սննդից, բայց կան դեպքեր, երբ դա լուրջ վիճակի ահազանգ է:

24 կողերն օգնում են ողնաշարին ճիշտ դիրքով մնալ և պաշտպանում են իրենցից ներս գտնվող օրգաններն՝ արտաքին ազդակներից:

Ձախ կողերի ետևում գտնվում են.

• ստամոքսի վերին մասը,
• փայծաղը,
• ստոծանու մի մասը,
• ենթաստամոքսային գեղձը,
• ավելի բարձր՝ սրտամկանն է,
• ավելի ներքև՝ բարակ աղիների մի մասը, սիգմայաձև և վայրէջ աղիները, ձախ երիկամը և միզածորանը:

Այդ շրջանում ցավի պաթոգենեզը դասակարգվում է.

• սպաստիկ, որը լինում է ուժեղ հոգնածության, մկանային դիստրոֆիայի, օրգանների հարթ մկաների լարվածության ժամանակ,
• վերտեբրոգեն․ ներառում են նևրոգեն խանգարումները, ողնուղեղային նյարդարմատների խնդիրները,
• պերիտոնեալ․ արդյունքում որովայնամզի գրգռվածություն է առաջանում,
• դիստենոզային․ որովայնի օրգաններում ճնշման բարձրացում, ֆիբրոզ պատիճների ձգվածություն,
• անոթային․ հյուսվածքների տրոֆիկ և հեմոդինամիկայի խնդիրներ։

Ձախ ենթակողում ցավի պատճառները

Ցավի պատճառ կարող են լինել տարբեր հիվանդությունները․

• ողնաշարի խնդիրներ․ օստեոխոնդրոզ, միջողային ճողվածքներ,
• միջկողային նևրալգիա․ ցավն առաջանում է հանկարծ, ուժեղանում է խորը ներշնչման ժամանակ, կողքի շրջվելիս, կանգնելիս կամ նստելիս, հազալիս, երբեմն պատճառը ողնուղեղային նյարդարմատների ճնշումն է,
• ենթաստամոքսային գեղձի ախտաբանություն․ պանկրեատիտ, բարորակ ուռուցքներ (ինսուլինոմա, գաստրինոմա, գլյուկագոնոմա), օնկոլոգիա, պանկրեոլիթիազ (կալցինատներ գեղձի մեջ),
• ստամոքս-աղիքային համակարգի ախտաբանություն. դիսպեպսիա, գաստրիտ, գաստրոէզոֆագիալ ռեֆլյուքս, խոցային հիվանդություն,
• փայծաղի հիվանդություններ․ սպլենոմեգալիա, վնասվածք, փայծաղի երակի թրոմբոզ, փայծաղի ինֆարկտ, աբսցես, բնածին անոմալիաներ (Պայրի հիվանդություն և այլն), պերիսպլենիտ,
• այլ հիվանդություններ. թոքերի հետ կապված խնդիրներ՝ պլևրիտ կամ թոքաբորբ, սրտանոթային ախտաբանություն, օրինակ՝ կրծքավանդակում այրոցի և սուր ցավի ժամանակ (նաև գլխապտույտ, սարսուռ, հևոց, քրտնարտադրություն) կարելի է կասկածել միոկարդի ինֆարկտ:

Ի՞նչ անել ցավի ժամանակ։

Եթե առկա է փսխում, հևոց, բարձր ջերմություն, անհրաժեշտ է շտապ դիմել բժշկի: Եթե ցավերը թույլ են և հազվակի, կարելի է միայն սննդակարգում փոփոխություն կատարել (բացառել աղի, կծու, ապխտած սնունդը, ճարպոտ միսը, ալկոհոլը) և հետազոտվել:

Ախտորոշումը

• Արյան ընդհանուր, կենսաքիմիական քննություն, մեզի հետազոտություն,
• որովայնի խոռոչի ՈՒՁՀ
• ֆիբրոգաստրոդուոդենոսկոպիա,
• ՀՏ, ՄՌՏ,
• էլեկտրասրտագրություն, էխոսրտագրություն,
• էլեկտրանյարդամիոգրաֆիա,
• փայծաղի սցինտիգրաֆիա,
• որևէ օրգանի նմուշ վերցնելու համար՝ լապարոսկոպիա։

Բուժումը

Բուժումը որոշվում է հայտնաբերված հիվանդությանը համապատասխան: