Պացիենտների համար

Անհրաժեշտ է կարգավորել օրվա ռեժիմը, սննդակարգը:

Առաջարկվում է հետևյալ սխեման.

• առավոտյան բացօթյա մարմնամարզություն,
• ջրային միջոցառումներ,
• առաջին նախաճաշ,
• քայլք /աշխատանքի գնալ ոտքով/,
• երկրորդ նախաճաշ,
• ճաշ,
• հետճաշյա և աշխատանքից հետո հանգիստ,
• ընթրիք քնելուց 2 ժամ առաջ,
• հանգիստ՝ քնից առաջ, 7-8 ժամյա քուն։

Օրվա ռեժիմը պետք է անհատական լինի:

Օրգանիզմում բոլոր կենսական գործընթացները կապված են էներգիայի մշտական ծախսման հետ, իսկ էներգիայի աղբյուրը սնունդն է:

Առողջ մարդու սնունդը պետք է բավարարի հետևյալ պահանջներին.

• որոշակի հաճախականություն /4- անգամյա/  և պարբերականություն՝ օրվա ընթացքում / 5 ժամը մեկ/,
• սննդի քանակական բաշխում,
• մթերքի որակային ապահովում,
• սնունդը պետք է լինի չափավոր տաք, հարկ է ուտել անշտապ, լավ ծամելով,  սպիտակուցների, ճարպերի, ածխաջրատների հարաբերակցությունը պետք է լինի 1:1:4,
• կալորիականությունը որոշվում է ըստ տարիքի, սեռի, մասնագիտության և այլն։

Կենտրոնական նյարդային համակարգի շնորհիվ մարդու օրգանիզմին բնորոշ է ինքնակարգավորումը, ինքնավերականգնումը:

Այդ պատճառով պետք է խնամքով վերաբերվել նյարդային համակարգի հետ կապված գործընթացներին, խուսափել սթրեսային վիճակներից:

Նպաստող գործոնների մեջ կարևոր դեր ունի ժառանգականությունը: Ժառանգականությամբ փոխանցվում է ոչ թե հիվանդությունը, այլ մարսողության օրգանների գործունեության առանձնահատկությունները: Հիվանդության զարգացումը կապված է նպաստող գործոններից՝ սննդից, ապրելակերպից, հուզական վիճակից:

Խոցային հիվանդության կանխարգելման գործոններից մեկը առողջ ատամներն են, ուստի նրանց հիգիենայի պահպանումը շատ կարևոր է:

Հիվանդության առաջացման գործում ոչ պակաս կարևոր է նաև ծխելը, որի արդյունքում գրգռվում է ստանոքսի գեղձային համակարգը:

Նիկոտինը նեղացնում է արյունատար անոթները, նպաստում բորբոքային գործընթացների զարգացմանը: Ստամոքսի համար մեծ վտանգ է նաև ալկոհոլը, որը նույնպես՝ գրգռելով ստամոքսի լորձաթաղանթը, նպաստում է ստամոքսահյութի ավելցուկային արտադրմանը, ստամոքսի կծկողականության ակտիվացմանը, ախորժակի բարձրացմանը, իսկ ստամոքսի գեղձերի վրա ունենում է «դաբաղող» ազդեցություն:

Ելնելով այս ամենից, ստամոքսի խոցի կանխարգելման համար անհրաժեշտ է օրվա ռեժիմի, հանգստի, սննդի ընդունման քանակի և որակի  ճիշտ կազմակերպում, հրաժարում վնասակար սովորություններից: