Պացիենտների համար

Շնչառական քրոնիկ անբավարարությունը /ՔՇԱ/ շնչառական համակարգի կողմից արյան գազային նորմալ հավասարակշռության ապահովման անկարողությունն է:

ՔՇԱ զարգացման պատճառներն են.

• Շնչառական օրգանների հիվանդությունները / թոքերի քրոնիկ օբստրուկտիվ հիվանդություն, բրոնխիալ ասթմա, ֆիբրոզ ալվեոլիտ և այլն/
• Քրոնիկ սրտային անբավարարությունը
• Ճարպակալումը
• Կենտրոնական և ծայրամասային նյարդային համակարգի հիվանդությունները
• Շնչառական մկանների և կրծքավանդակի խնդիրները

Շնչառական անբավարարությունն առաջացնում է.

• Դիսպնոէ /հևոց/
• Աշխատունակության և կյանքի որակի իջեցում
• Էրիթրոցիտոզ /արյունը դառնում է ավելի թանձր, բարձրանում է թրոմբառաջացման հակումը/
• Մկանային թուլություն և վաղ հոգնածություն
• Թոքային հիպերտենզիա /ծանրաբեռնվածություն սրտի վրա/
• Էնցեֆալոպաթիաներ /թուլամտություն, ինսուլտ/
• Կորոնար պաշարի նվազում /ինֆարկտ/
• Նեյրոպաթիա /վերջույթների թմրածություն, տրոֆիկ խոցեր/

Ախտորոշումը
Շնչառական քրոնիկ անբավարարության տարբեր ախտաբանական տարբերակների ախտորոշումը իրականացվում է շնչառական համակարգի ախտահարման բնույթից, առկա հիմնական հիվանդությունից, հևոցի յուրահատկությունից և արտաքին շնչառության խանգարումից առաջնորդվելով: Կատարվում են անհրաժեշտ լաբորատոր և գործիքային հետազոտություններ՝ սպիրոգրաֆիա, բոդիպլետիզմոգրաֆիա, թոքերի դիֆուզիոն ունակության հետազոտում:

Բուժումը
Շնչառական քրոնիկ անբավարարությամբ բուժառուների բուժումը պետք է լինի համալիր, ներառի գազափոխանակության խանգարման, թթվա-հիմնային, էլեկտրոլիտային հավասարակշռության կարգավորում, հիմնական հիվանդության բուժում:

Բուժման ամենակարևոր մաս է կազմում ռեսպիրատոր թերապիան: