Պացիենտների համար

Ստամոքսի և 12- մատնյա աղու խոցային հիվանդությունը քրոնիկ ռեցիդիվող (կրկնվող) հիվանդություն է, որի ժամանակ ստամոքսի լորձաթաղանթի վրա առաջանում է խոց՝ ստամոքսի լորձաթաղանթի լոկալ դեֆեկտ: Ստամոքսահյութի, լեղու ազդեցությամբ գործընթացի մեջ ընդգրկվում է նաև ենթալորձային թաղանթը՝ այդ շրջանում առաջացնելով տրոֆիկ խանգարումներ:

Պատճառները

• Ստամոքսում հելիկոբակտեր պիլորի (Helicobakter Pilory) մանրէի առկայություն,
• որոշակի դեղորայքի ընդունում,
• սխալ սննդակարգ,
• ժառանգական նախատրամադրվածություն,
• երկարատև նյարդային լարվածություն,
• իմունիտետի նվազում,
• ծխելը:

Ախտանշանները

Ամենաէական ախտանշանը ցավն է` էպիգաստրալ շրջանում («սրտագդալի»): Ցավը տեղակայվում է էպիգաստրալ շրջանի որոշակի սահմանափակ տարածքում և կապված է սննդի ընդուման հետ. առաջանում է ուտելուց կես, մեկ ժամ անց:
12-մատնյա աղու խոցի ժամանակ հաճախ դիտվում են «քաղցած» ցավեր, որոնք անցնում են սնունդ ընդունելուց հետո:

Այլ ախտանշաններն են.

• այրոց. սովորաբար դիտվում է խոցային հիվանդությունից առաջ՝ մի քանի ամսվա, տարվա ընթացքում,
• սրտխառնոց,
• փսխում,
• կղանքը մուգ գույն է ունենում` արյունահոսության դեպքում:

Բարդությունները

• Արյունահոսություն,
• Պերֆորացիա (թափածակում),
• պենետրացիա (ենթաստամոքսային գեղձի կողմում),
• սպիական հիվանդություն,
• ստամոքսի փականների ստենոզ,
• մալիգնիզացիա:

Ախտորոշումը

• Էզոֆագոգաստրոդուոդենոսկոպիա,
• ստամոքսի և 12-մատնյա աղու ռենտգենագրաֆիա` բարիումի կոնտրաստի կիրառմամբ,
• հելիկոբակտեր պիլորիի հայտնաբերում, արյան հետազոտություն, շնչառական թեստ:

Բուժումը

Հիվանդությունը բարդ է և պահանջում է երկարատև բուժում:

Հաճախ նշանակվում է կոնսերվատիվ բուժում, եթե հիվանդությունը բարդացած չէ (պենետրացիա, պերֆորացիա և այլն): Կոնսերվատիվ բուժման շրջանակում նշանակվում են՝ համապատասխան դեղորայք, հատուկ սննդակարգ, պետք է բացառել վնասակար սովորությունները, կարգավորել օրվա ռեժիմը, ապրելակերպը:

Բուժումը նշանակելիս հաշվի է առնվում հիվանդի տարիքը, հիվանդության ընթացքը, տևողությունը, արդեն ընդունած բուժման արդյունավետությունը, խոցի տեղակայումը և չափերը, ստամոքսահյութի բնույթը, ստամոքսի մոտորիկան, ուղեկցող հիվանդությունները:

Սննդակարգ. փոքր քանակի և հաճախակի սննդի ընդունում` ըստ բուժող բժշկի նշանակած սխեմայի: