Պացիենտների համար

Ցավոտ միզապարկի համախտանիշ

Ցավոտ միզապարկի համախտանիշը կամ ինտերստիցիալ ցիստիտը քրոնիկ հիվանդություն է, որի ժամանակ բուժառուներն ունենում են ցավ միզապարկի, փոքր կոնքի շրջանում միզելու հաճախացած, ուժեղ ցանկություն /ուրգենտություն/, գիշերային միզարձակում: Ինտերստիցիալ ցիստիտը հաճախ դիտվում է կանանց մոտ և նշանակալիորեն իջեցնում է կյանքի որակը:

Ինտերստիցիալ ցիստիտի ախտանշանները

Ցավ փոքր կոնքում կամ հեշտոցի և հետանցքի միջև՝ կանանց մոտ, ամորձիների և հետանցքի միջև՝ տղամարդկանց մոտ:
Քրոնիկ կոնքային ցավ
Միզելու մշտական, անզուսպ ցանկություն
Հաճախացած միզարձակում մեզի փոքր քանակով
Գիշերային միզարձակում
Ցավ և տհաճ զգացողություն լիքը միզապարկի դեպքում: Միզապարկի դատարկումը հաճախ թեթևացում է բերում
Ցավ սեռական հարաբերության ժամանակ

Ախտորոշումը

Անամնեզ, միզարձակման օրագրի վարում /խմած հեղուկների քանակը, միզարձակումների նկարագրությունը 2-3 օր/:
Գինեկոլոգիական զննում
Մեզի հետազոտություն
Կալիումի լուծույթով զգայունության թեստ. միզապարկի մեջ հերթականությամբ ներմուծվում են ջուր և կալիումի լուծույթ: Գրանցվում է բուժառուի զգացած ցավը և միզելու ցանկությունը: Եթե ցավը լինում է կալիումի լուծույթի ներմուծումից, դա ինտերստիցիալ ցիստիտի նշան է: Առողջ մարդկանց մոտ երկու դեպքում էլ որևէ ռեակցիա չի լինում:
Ցիստոսկոպիա – ցիստոսկոպով հետազոտվում է միզապարկը, որը տեղային կամ ընդհանուր անզգայացման պայմաններում մտցվում է միզապարկ:
Միզապարկի բիոպսիա – ցիստոսկոպիայի ժամանակ հիստոլոգիական հետազոտման համար վերցվում է հյուսվածքի նմուշ:

Բուժումը
Բուժումը համակարգային է․ երբեմն պահանջվում է երկար ժամանակ բուժառուի համար բուժման համակարգ ընտրելու:

Եթե միզապարկի ցավը կոնքի օրգանների սպազմի հետևանք է, կարող է օգնել ֆիզիոթերապիան:

Դեղորայքային բուժման ժամանակ նշանակվում են ոչստերոիդային հակաբորբոքիչներ /իբուպրոֆեն և այլն/, տրիցիկլիկ հակադեպրեսանտներ /ամիտրիպտիլին, իմիպրամին/, հակահիստամինային դեղեր /կլարիտին/, նշանակվում է նաև պենտոսան պոլիսուլֆատ /Էլմիրոն/:

Օգնում է նաև նեյրոստիմուլացիան. Էլեկտրական իմպուլսները բարելավում են միզապարկի արյան շրջանառությունը: Արվում է նաև սակրալ նեյրոմոդուլացիա:

Միզապարկի ինստիլյացիայի ժամանակ դեղորայքը ներմուծվում է անմիջապես միզապարկ:

Վիրահատական բուժում
Վիրահատական միջամտությունն իրականացվում է հազվադեպ: Այն ցուցված է այն բուժառուներին, որոնց չի օգնում կոնսերվատիվ (ոչ վիրահատական մեթոդներով) բուժումը:

Վիրահատական մեթոդներն են.

Խոցային ցիստիտի ժամանակ խոցերի լազերային կոագուլացիա կամ էլեկտրոկոագուլացիա
Միզապարկի խոցի հեռացում
Միզապարկի աուգմենտացիոն պլաստիկա: Նրա հյուսվածքի մի մասի փոխարինում աղու հյուսվածքով: Բայց արդյունքը միշտ չէ, որ գոհացուցիչ է լինում:

19.12.2022