Պացիենտների համար
- Covid 19
- Մաշկային հիվանդություններ
- Մարսողական համակարգ
- Սիրտ-անոթային համակարգ
- Թերապիա
- Ոսկրա-մկանային համակարգ
- Քիթ-կոկորդ-ականջաբանություն
- Նյարդային համակարգ
- Ուրոլոգիա
- Գինեկոլոգիա
- Առաջին օգնություն
- Էնդոկրինոլոգիա
- Վիրաբուժություն
- Առողջ ապրելակերպ
- Ախտորոշում
Խոլեցիստիտ
Խոլեցիստիտը լեղապարկի բորբոքումն է: 85-95 տոկոս դեպքերում այն ի հայտ է գալիս լեղաքարային հիվանդությամբ տառապողների մոտ: Հիվանդության այլ պատճառներն են՝ լեղու կանգը, բակտերիալ վարակը, լեղապարկի արյան շրջանառության խանգարումը:
Ըստ ընթացքի տարբերում են սուր և քրոնիկ խոլեցիստիտներ:
Սուր խոլեցիստիտը 90-95 տոկոս դեպքերում զարգանում է լեղուղիների քարերով խցանման հետևանքով (լեղաքարային հիվանդությամբ տառապողների մոտ): Այլ պատճառներ հանդիպում են շատ քիչ դեպքերում:
Հիվանդների տարիքը հիմնականում 30-80 տարեկանն է: Կանայք ավելի հաճախ են հիվանդանում:
Ախտանշանները
- Աջ թուլակողում ցավի նոպաներ,
- Ավելի ուշ ի հայտ են գալիս սրտխառնոց և փսխում,
- թուլություն, ջերմության բարձրացում:
Աստիճանաբար հիվանդի վիճակը վատանում է: Թվարկված ախտանշանների դեպքում պետք է դիմել բժշկի: Եթե ժամանակին բժշկական օգնություն չի ցուցաբերվում, ապա հիվանդության սկզբից 3-4 օր անց կարող է առաջանալ այնպիսի վտանգավոր բարդություն, ինչպիսին է պերիտոնիտը՝ որովայնամզի բորբոքումը, որը կարող է բերել մահվան:
Քրոնիկ խոլեցիստիտ
Քրոնիկ խոլեցիստիտն ավելի քիչ վտանգավոր է կյանքի համար, քան սուր խոլեցիստիտը, բայց այն կարող է վերափոխվել սուր խոլեցիստիտի:
Այս հիվանդությամբ կանայք հիվանդանում են տղամարդկանցից 2-3 անգամ ավելի հաճախ:
Հիվանդությունն արտահայտվում է աջ թուլակողում չափավոր պարբերական ցավերով, սրտխառնոցով, փսխումով: Հաճախ հիվանդության ախտանշաներն արտահայտվում են ճարպոտ կամ կծու սնունդ ընդունելուց հետո:
Ախտորոշման համար ներկայում ամենատեղեկատվական, անցավ հետազոտման մեթոդ որովայնի խոռոչի ուլտրաձայնային հետազոտությունն է:
Սուր խոլեցիստիտի բուժումը
Բուժումն իրականացվում է վիրաբուժական բաժանմունքում: Բուժական մոտեցումն անհատական է:
Հիմնական սխեման
- Նշանակվում է սով` 3-4 օր,
- Սառը` որովայնի առաջային պատին,ներերակային տրվում են աղային լուծույթներ, գլյուկոզա 5 տոկոսանոց, , որոնց մեջ ավելացվում են սպազմոլիտիկ, ցավազրկող պատրաստուկներ (Բարալգին, Ռենալգին և այլն), որոնք կատարվում են նաև միջմկանային ներարկումով:ւժեղ ցավազրկողների օգտագործումը հակացուցված է, քանի որ դա կթաքցնի հիվանդության իրական պատկերը:
- Նշանակվում են հակաբիոտիկներ:
- Այլ պատրաստուկնե` կարիքի դեպքում:
Եթե խոլեցիստիտը լեղաքարային հիվանդության հետևանք է և դեղորայքային բուժումն արդյունք չի տալիս, անհրաժեշտ է դիմել վիրահատական միջամտության:
Քրոնիկ խոլեցիստիտի բուժումը
Բուժման մեթոդի ընտրության հարցում մեծ դեր ունի լեղաքարային հիվանդության առկայությունը: Եթե լեղապարկում առկա են քարեր, վիրահատությունը պարտադիր է, եթե չկան՝ իրականացվում է կոնսերվատիվ բուժում:
Քարերի բացակայության դեպքում նշանակվում է խիստ սննդակարգ (սեղան №5):
Սննդից պետք է բացառել սուր և տապակած, ապխտած կերակուրները, պահածոները, երշիկեղենը, կակաոն, շոկոլադը, ալկոհոլը, կծու պանիրը:
Կարելի է օգտագործել լեղամուղ մթերք, եթե դրանք ցավ չեն առաջացնում, եփած ձու՝ չափավոր քանակով, ոչ աղի, թարմ կարագ, ձիթապտղի ձեթ, կաթ, թթու կաթնամթերք, ոչ յուղոտ միս, թարմ ձուկ:
Հիվանդներին խորհուրդ է տրվում լեղամուղ պատրաստուկներ.
- Խոլենզիմ,Ալլոխոլ
- Խոլագոլ և այլն
- Լեղամուղ դեղաբույսերի եփուկներ՝ եգիպտացորենի մազիկներ, անթառամի ծաղիկներ և այլն: